الخرطوم | جوال الخير
كتب الشيخ د.م.محمد هاشم الحكيم عبر صفحته الرسمية بحساب فيسبوك عن تجربته في تربية أبنائه قائلا : ” أنا ماشاء الله أبو بنات والأولاد أقل ؛ ربنا يحفظهم اجمعين ويشفي حسناء؛فعندي نظرية عملية بطبقها للحلوين في الاجازة ؛مافي مصروف الا بمقابل ، يعني تحصل على مال مقابل العمل فقط- طبعا الحلوين اهم حاجة رصيد الموبايل النت اللي بي ٣٠ ج في اليوم ومليون الشهر ! -لمن يعترضوا على المقابل ومرات يتفلسوا يا بابا عمالة الاطفال ممنوعة !وطبعا تجي الامهات تصطاد في الماء العكر ويقيفن مع العيال لزوم التجارة بالمواقف الانسانية هههه- انت مش بتدينا المصروف ايام المدرسة ، الفرق شنو ؟- في فرق؛ ايام المدرسة عشان انتو تؤدوا في وظيفة التعلم تاخذوا مصروفكم ونفرغكم لها ؛لكن في الاجازة لازم تستحقوه بمجهودكم ببساطة تؤدوا العمل في البيت تاخذوا فلوس !تعملوها نوم وتلفزيون ولعب مافيش فلوس !
طيب كدة يعني تعلمهم الانتهازية وانهم يشاركوا في الاسرة بمقابل ويبقوا ماديين ؟ووولا يا حبيبنا ؛ الطفل اجعل له في المنزل مهام رئيسية يقوم بها ، فاذا اراد المال تعطيه مهام اضافية مقابل المال ،، عرفت ؟مثلا الولد مطلوب منو يوميا مهام رئيسية امام دوره كفرد في الاسرة بنسميها ليو الواجبات، مثلا يوميا يظبط سريره و يمش مشوار صباح ومساء للدكان ، ويشيل الزبالة آخر اليوم الخ..دي ثابته وواجبات عليو لكن لو عايز فلوس؛ يبقى لازم تديو فرصة يحصل عليها عبر المهام المنتجة:يرص الطوب اللي في الحوش ، يغسل العربية، يزرع الزقاق ، يبني بيت الدجاج ، ينظف السطوح ، كراكيب راس البيت ، يحرق الزبالة في الشارع ، يحمر تسالي يييعو ، يحفظ سورة قرآن ولا شعر ، كلمات انجليش الخ
طيب والبنوتات ؟ديل طبعا قصتهم احلى، يعني العسولة واجبها اليومي واضح:نظافة المنزل وده طبعا بيتقسم بيناتهم عادي ، تلميع الاثاث ، تغسل ملابسها تعمل الشاي الخدي الواجبات امام دورها في الاسرة ،،طيب لو عايزة فلوس تعمل شنو ؟ايوة بسيطة : تغسل العدة المردومة بعد الغدا ، تقري اخوها الصغير ، تغسل الملايات والملابس الدستة بي ١٠٠ ج ، تكوي ملابس بابا وماما والصغار ، تسحن البهارات ، تجفف بصل، تعمل البسكويت ، تلم ملابس الشتا في الشنط الخيعني واجبات يومية مع فرصة لكسب المال عبر واجبات إضافية وكلو بي حقويعني قدر قدرتك ادفع لهم طبعا في مهمات جماعية ممكن يكون المقابل كبير ؛ يعني تنظيم جمعية ادبية ، او اداء مسرحية او تغيير نظام البيت… عنا مثلا المقابل كبير ؛ عزومة في مطعم، رحلة البحر، منتزه الدوحة، شاطيء توتي ، قرووش جوايز الخ
عندي بنية كدة حنكوووشة ما بتشتغل ، كان غسلت مريلة المدرسة تتهد وتزعل كمان؛ كانت مرة عايزة قروش تغير الجوال ، اصطدمت بنظرية الحكيم الاقتصادية الانتهازية هههما تتخيلوا بقت تغسل في اليوم خمسة دستة ملابس وزيادة هههه وتشاكل أخواتها في الغسيل.والله البنات بقن الهدوم نضيييفة يشيلوها للغسالة لمن شاكلتهم كملوا الصابون كمان هههه وطبعا غسيل الملابس والعدة ده بريح الامهات شديد ، يفضوا ليك شوية يا حسب اللهو يريحك من الدستة بتاعة الشغالات البي ٣٠٠ و ٥٠٠ ديك وتاكل فطور تسعة عيشات ههه ( دي مزحة ) ؛ البنوتات بيرضن بي ١٠٠ و ٢٠٠ بس والله البنات بقوا يتشاكلوا في الغسيل عشان القروش، سبحان الله حتى الولد بقى عايز يغسل ملابس عشان بتجيب قروش اكتربصراحة اتعلموا الخدمة وبي همةكمان اجمل حاجة التدريس ، يمسكوا اخوانهم يشرحوا ليهم ، الحصة بي الشيء الفلاني للبدرس والليدرسوه برضو بندفع ليو ، ومرات ترشي اخوها احضر لي الحصة بديك كدةومرات البكتب الجداول تدفع ليو والذ حاجة عشان ما ينسوا خاصة الرياضيات والإنجليزي ؛ كل شهر لازم يحلوا تمارين الكتاب كلو ويسلموك مكتوب ؛ دي طبعا ممكن تدفع فيها قروش كتييرة بالمليون ،والبصحح التمارين لي اخوه ذاتو تديو .. ما تستخسر حتوفر لك كتير لي قدام .ياخي جيد والعز في الروضة اخواتهم حفظوهم المنظومة البيقونية في علم الحديث !
الموضوع اتطور ودخل فيو تدريس ناس الحلة بي قروش كمان بالجد حيقروا ويتحملوا المسئولية جربوها واحكوا لينا.
طبعا الذ حاجة الأولاد بقوا معلمين بتوع عسل النحل تديهم قربة كاملة يعصروها في يوم كامل يعبوا ليك ١٠٠ رطل عسل ويبيعوا للزباين وياخذوا حقهم عاادي اسع اتفقوا قالوا ما دايرين قروش يس تدينا نسوق العربية قلت ليهم دي مجااانا أسع هههه المرة الجاية ححكي ليكم عن يوم الروقة في الأسرة.
