الخرطوم الرائد نت 24 ديسمبر 2021
كتبت الصحفية السودانية أ.عائشة الماجدي على صفحتها الرسمية بفيسبوك:
في تقاطع عفراء وانت متجه شرق هنالك فجأة علي يساري حدثت ربكة اقرب الي الحادث بين سيارتين لكن قدر ولطف فحدثت زحمة بصورة غريبة في المكان والشارع عامة…
وانا متجهة شرق جغرافي علي يميني سناء مول فجأة توقف أمامي صاحب ركشة بشكل عكسي للشارع أوقف ركشته أمام سيارتي مباشر وربع ايادي …
انا توقفت مخلوعة والشارع خلفي تزايدت أصوات البوري وحكاية ما تمشي يا بت وقصص زي دي والزولة دي ماله …
ألما شفت الاصوات زادت أمنت العربية ونزلت علي بتاع الركشة في شنو يا ود الناس حرك ركشتك دي وقفنا الشارع نحن ياخ …
الشاب ما بتكلم خالص بس قاعد جوه الركشة ويبادل الناس في النظرات….
برضوا أصحاب العربات كمية جوا اتكلموا معاه وهو برضو ساكت زي زي الصنم يفلفل في شعرو ومرة يدنقر وحركات ما مفهومة …
انا : ياود الناس انت كان عيان كلمنا وكان ميت وبترمش كلمنا ياخ
وبرضو ما بتكلم ….
خلاص المكان كتم والناس كترت اييييييك بعد شوية رجعت انا العربية واتشاورت مع بعض الشباب علي حل …
اتفقنا يشيلو الولد دا بركشتو ويدفسو علي رصيف الساحة الخضراء وقد كان الوليدات شالوا الولد بالركشة مقابل الظلط …
دورت وجيت قريب لي قلت لي بالشباك بحرقة واحد سكران بالله تحول الي مهرج بدل كان ساكت وايييييك نبذني نبذ العدو ….
المهم ياخ لما تسكروا امشوا بيوتكم ما تعذبوا الشارع العام معاكم عشان دي ما طريقة حضارية وشحدت ربي يلم فيكم ود مقنعة يالسكرانين أو البالعيين حبوب يعدمكم نفاج النار.
