متابعات/ الرائد نت
كتب عمر ابن الشيخ د.عبدالحي يوسف على صفحته الرسمية بفيسبوك قائلا:
من اكتر الأسئلة البتتطرح في الفترة الفاتت ويكثر النقاش حولها ويُروّج لها (لماذا هرب الشيخ عبدالحي يوسف؟) وفي الغالب النقاش بياخد شكلين (ليه ما جا واثبت براءته؟) و (ليه ما رجع بعد سقوط قحت؟)
قبل التفاصيل والنقاش مع اي زول حول الموضوع دا في سؤال مفروض يكون عندك عنه اجابة واضحة (ما هي تهمة الشيخ عبدالحي يوسف؟) في الغالب اي زول تسألو السؤال دا حيقول ليك “عشان استلم قروش من البشير” ودي للأسف سببها الترويج القحتي اللي بدأ بعد عودة النائب العام الأسبق من “الامارات” لما ذكر الكيانات الاورد اسمها الرئيس الأسبق عمر البشير في قضية الاموال الحاكموه بسببها. فذكر النائب العام الكيانات وذكر اسم الشيخ عبدالحي لا الكيان الحصل التبرع ليهو.
نجاوب عن السؤال (لماذا هرب الشيخ عبدالحي؟) ببساطة الشيخ ما هرب أبدا. حكومة قحت استلمت الحكم في السودان في شهر أغسطس من العام ٢٠١٩ في ظل حملة شيطنة ممنهجة للشيخ في السوشيال ميديا يقودها رؤوس القحاتة وصفحاتهم، واتفتحت بلاغات في مواجهتهم واتحفّظ نفس النائب على البلاغات ووجّه بعدم السير في الاجراءات بل الشخصيات المحظورة من السفر بسبب البلاغات سُمح لها بالسفر عادي دا كلو وشيخ عبدالحي موجود في البلد. بل اتصادرت منظمة المشكاة الخيرية ومنصات شركة الاندلس البتبث عن طريقها قناة طيبة الفضائية وبرضو الشيخ موجود في البلد، بل انو الشيخ سافر لتصوير حلقات سواعد الاخاء فأشاع العجوز الاصلع انو هرب وبعدها الشيخ رجع السودان والاصلع بلع كلامو .. وفي شهر ديسمبر ٢٠١٩ الشيخ سافر لمؤتمر في مدينة كوالالمبور وفي اثناء وجودو هناك ومع تصريحات النائب وقتها تم فتح بلاغ ضد الشيخ وعدد من قيادات ونشطاء العمل الدعوي في السودان بتهمة عابرة للحدود ترتبط ارتباطا وثيقا بنظام خليجي محدد بيغلفها لكل شخصية غير مرغوبة وشمل البلاغ ٦ شخصيات سودانية من بينهم دُعاة ورجال اعمال وعدد من الشخصيات من خارج السودان اصلا تم اعتقالهم في ٢٠١٧ في بلادهم. في وقتها أشار عدد كبير من اهل الفضل على الشيخ بعدم الرجوع للسودان لأمرين “حملة الإذلال المتعمدة من النظام القحتي لكل مخالف” و “مواصلة النشاط الدعوي بحرية” وفعلا بعدها في شهر يناير ٢٠٢٠ أُغلقت قناة طيبة الفضائية بأمر لجنة “اراضي واراضي” وبمجهودات الطيبين عاودت البث من خارج السودان.
اغلب الناس البتناقش في الفساد -المكذوب – المنسوب للشيخ وادّعاءهم انو هرب بأموال حسب ما روّج قيادات قحت ببساطة مفروض تسألهم سؤال “لماذا لم تكشف حكومتكم خلال سنتين ونصف عن هذه الأموال؟” ولجنة اراضي واراضي كانت بتقيف كل اسبوع ساعتين بث مباشر تصادر في ممتلكات الناس وتشهّر بيهم ف ” اين املاك الشيخ عبدالحي؟” نسبو للشيخ ٥٥٠ مليون دولار وعدد من الشركات والفلل والبيوت وينها؟
السؤال البيتطرح (ليه ما جا واثبت براءته؟) مفروض اجابة السؤال دا تكون حاضرة في ذهن كل واحد عاش في فترة التلاتة سنين الفاتت دي وشاف انتهاك القحاتة لمنظومة العدالة وتعمّدهم تعطيل المحاكم وسجن الخصوم دون مراعاة الفترات القانونية لدرجة انو بلاغ “مُعمّر” اتسجن فيهو سنة بدون محاكمة وافرج عنو بالضمانة والمتهم معاه في نفس البلاغ “الجزولي” اتسجن سنتين وما اتعملت محاكمة الا بعد سقوط نظام قحت في اكتوبر ٢٠٢١.
طيب ياخ (ليه الشيخ ما رجع بعد سقوط نظام قحت؟) الاجابة من شِقين الاول : يرجع وين؟ .. ودي اجابة سؤال بسؤال لكل واحد عارف تغير وضع البلد في التلاتة سنين دي. والشق التاني من الاجابة انو مع الاسف الموضوع ما مرتبط بالقحاتة بس.
أخيرا .. الشيخ حفظه الله كالغيث اينما هطل نفع فهو منذ ان عرفناه في سفر وترحال بين مؤتمر واجتماع ومحاضرات لا يكل ولا يمل والحمد لله رب العالمين هو بخير وصحة وعافية وسعة رزق لا يشكو بأسا ونسأل الله أن يطيل عمره في طاعته وأن يلبسه دوما ثوب الصحة والعافية وأن يوسّع في رزقه وان يكفيه شر الاشرار وكيد الفُجّار.
التعليقات مغلقة.